ئەی مەحەبەت؛

  لە پێش دیدەی خۆڵەمێشی ئەم چەرخەدا،

  دنیا ڕاوی تین و توانی دڵم ئەکا.

من ترسێک لە ئەزەلەوە ڕامیکردووم،

  لەم کێبڕکێ خۆکوژیەی ئارەزوودا،

  شەو و ڕۆژ ئەکەم بە یەک و

  بەر ڕۆشنایی دەرکەوتنێکت ناکەوم.

 ئەی مەحەبەت؛

  گەر دڵم بێنیتە قسە،

  تڕوهاتی ئەم زمانە و

  خولیای پووچ و سەرابیانەی ئەم کەللەسەرەم بۆچیە؟!

     (دارا عەلی)

لە نێوانی من و تۆدا

  لە نێوانی دیدەی من و شەوقی تۆدا،

  تا ئارەزوو چاوی بڕکا،

  چین لەسەر چین ...دیوار.

  لە مابەینی دڵی من و عەشقی تۆدا،

  تا درێژبوونەوەی لەزەت،

  بەستە لە دوای بەستە...بەربەست.

  لە نێوانی چاوەڕوانی من و هەڵهاتنی تۆدا،

  تا حەقیقەت باوێکشبات،

  قەتارە لە دوای قەتارە...چڕە دووکەڵی پەنگخواردوو.

  سەرەڕۆیی جەنگی دنیا و بەرۆکی من دوایی نایەت،

  بەم چەندوچونە بێت هەرگیز من و تۆ قەت ناگەین بەیەک. 

  تۆ  لە پەنهاندا ئەسووتێیت ...منیش دڵم،

لەم جەنجالی دۆزەخەدا ئەبێ بە سووتووی خۆڵەمێش.

     (دارا عەلی)

وەرە دڵم

  وەرە دڵم،

  لەم گێژەنی نەفسی بەد و شەڕانگێزە ڕزگارم کە،

  چەند دۆڕاندنەکان.... هاڕیمی،

  بردنەوەکانیش هەر مژدەی شکشتی خۆشەویستیم بوون.

  وەرە فریادڕەسی بوونم،

  لەنێو بەرداشی ئەم چەرخی حەقیقەتانە دەرم بکە،

 چەند ژێرکەوتنەکان.... کوشتمی،

  سەرکەوتنتنەکانیش بە هاڕەی ووردوخاشبوونی ئاوێنەی هەر ئەوینی من مەست ئەبوو.

    (دارا عەلی)