دڵم تەنگە

  نەمانگەشەو دادی بێزاری من ئەدات،

  نەخۆرەتاو.

  من بەسەر ئەم گۆی زەوییەوە تاک و تەنیا و

  لەسەر شێوەی ڕاستەهێڵێک

  ڕۆژانە ئەچمە سەرکار و دوانیوەشەوێ دێمەوە.

  دڵم تەنگە و

  وەڕسیم... هیچ کەڵکەڵەیەک ڕامی ناکات،

  مەگەر تەنها تۆ دەرکەوی و

  بە دە پەنجەی خۆشەویستیت

  تاری ڕۆحی کەسیرەم چڕ بژەنیت و

  لە جۆلانەی ئاوازێکی کەیل و مەستدا،

  بمخەیتەوە سەما لەگەڵ قەد و باڵای عەشقی خۆتدا.

    (دارا عەلی 24/4/2014)

وەرە خانەخەراب

  چ دۆزەخێکە دنیا

  بۆ سواڵی ژیانی سبەی،

  من ڕۆژانە،

  ئەبێت دەست لە مردن پانبکەمەوە.

  (٢)

  ژیان چوون نەخۆشێکی شپرزە

  لە قاوشە ناکۆتاییەکانی ئەم سەردەمە فایرۆسیەدا.

  نەدەوا و نەدەرمان،

  دادی ئازاری ئەبەدی بیمارییەکانی ئەم ڕۆحە تێکشکاوە نادات.  

  (٣)

 وەرە خانەخەراب، 

  هەر ئەڵێ ی خانەیەکی ژێرپەنجەی مەدالیای ئەم سەدەیەی.

  وەرە و

  قەتماغەی درۆینەی ئەم زامانەم هەڵکۆڵە و وێرانم بکە.

  وێرانتر لە نیگەرانی ئەم خەراباتەی خۆت ئەی دۆست.

  ئیتر من بێباکانە

 یا ئەم تراویلکەیەی ژیان توڕئەدەم و

  لە گۆڕستانی خۆشبەختی خۆمدا ئەخنکێم.

  یاخود

  لە داروپەردووی ڕۆحی داڕماوی خۆم،

  تۆ و ژیان سەرلەنوێ بینائەکەمەوە.

     (دارا عەلی 2014/4/18)