ئێستەش نەمزانی حیکمەتی کام ڕێکەوت بوو

ئێستەش نەمزانی حیکمەتی کام ڕێکەوت بوو،

من لەوێ بم و تۆش لەوێ.

من وەک نەسیمی دوا وەشتێ گەییشتم و

تۆش چوون ڕووناکی هەتاوی دوا بارانێ.

تۆ لەوێ بوویت و من لەوێ

ئەتووت سێبەری مۆسیقا و خەیاڵی شیعرێکی (نالی)ین،

من بۆ ئەبەد دڵم خستەبەر ڕێژنەی خۆرەتاوت و

تۆش ڕووت  بەخشی بە شنەی شەماڵ و باخی دڵت ئاوەدانکرد.

(دارا عەلی 30/8/2014)

دنیا زۆر تەنگ و تەسکە بە پێ ی عەشق ئەی یار

  دنیا زۆر تەنگ و تەسکە بە پێ ی عەشق ئەی یار،

  پیاسەیەکی دوو بە دووی دڵی من و تۆ تیایدا بۆتە مەحاڵ.

  ئیتر بۆ دەرچوون، هەر ئەبێ بە پێ ی پەتی

  بەسەر گڕوکۆی دۆزەخی ئەم بەستەڵەکی چەرخەدا 

  پێ هەڵهێنین و دەربکەوین.

(٢)

  لەم زۆنگاوە بۆگەنەدا، وەڕسییم تا بینەقاقام هاتووە و

  خەریکە ئەخنێکم.

  تاوناتاوێک،

  بۆ کڕینەوەی نەفەسێک،

  ئەبێت دڵم ووردبکەمەوە..

  ئەمئێستاکە؛

  نە ووردە ما و نە شکۆی ڕۆح،

  لە بێ دڵیدا،

  داهۆڵی خواوەندەکان لە جەرگەی ژیاندا ئەچەقێنم..

  من لە نێوان

 خنکان و چێژی ئەم گەمە پووچەدا دەمێکە مردووم..

  مەگەر مەرگی ئەم یاسایە بە تەقینەوەیەک لە ناخمدا ڕابسپێرم،

  هەتا سەرچاوەی مردن و

   کۆت و بەندی چی چێژ و ئارەزووی باوە لە ڕۆحمدا ووردوخاش بکات..

    (دارا عەلی)