تۆ نامدوێنی و
منیش مەراقی تەنیاییم، چوون دوودڵیم،
لە باوەشی شەوگارێکی ئەبەدیدا،
بەدەم کزەی ئەم حەیران و لاوکەوە،
سەوزبوونی،
درێژ
درێژ
ئەبێتەوە
تا لای مردن.
٢
تۆ نەسەیری چاوی من و ئاوێنەکانی خۆت ئەکەیت،
من پەڕوباڵی غەریبیم، چوون گومانم،
بەدەوری خەمی گڕگرتووی ئەم مەقام و بەستەیەدا،
شەقژەنێتی و
لە زیکری بێ-تۆ-ییدا
وەکو شێت،
خوول ئەخوات و
سەما ئەکا،
تا لە دیدەنی قەدەری کڵپەیەکدا
ئەبێت بە سووتووی خۆڵەمێش.
٣
تۆ لە کۆڵانەکانی وەفادا، نەتکرد ئاوڕێک بدەیتەوە
لە نەفەسی قووڵی زامی ئەم فلووتە و
لە گۆرانی چاو لەڕێت و
نەوای ئەم تارژەنی ڕۆحە،
منیش شوشەبەندی دڵم، چوون تەماشام،
بەدەم چریکەی شمشاڵی ئەم خەمەوە
لە حەسرەتا
هەڵئەلەرزێ و
لەم تەمومژی وونبوون و غوربەتەدا،
هاڕڕە ئەکا و
لە نێو بێدەنگیتا نووقم و
لە خەمساردیتشتا ئەخنکێت..
(دارا عەلی)
No comments:
Post a Comment