وەرن بکوژەکانی من

١ مردن چ بێشەرمانە
لە شاشەکانەوە، حەقیقەتمان دەرخوارد ئەدا،
لە گۆڤار و ڕۆژنامەکانەوە، قارەمانی و شەهادەت ئەبەخشێتەوە و
ئامادەمان ئەکات بۆ ملدان بە ناچاری، بە خۆکوشتن.
بڕوانە؛
جادووی موعجیزەکان چۆن دەستی چاوەڕوانییان بڕین
سەرکزی و قەناعەت ئومێدیان چۆن زەلیل کردین.
٢ مێژووی من
ڕاگوزەر بوو بە ڕاڕەوێکی تاریک و خوێناوی دا،
پڕ بوو
لە قاڵبە سەهۆڵی ڕاستی وsea
لە مزگێنی درۆی گەورە و
حەقیقەتیش،
شلکردنەوە و تووندکردنەوەی بەنگەخوێنی هەر تەنها شڕواڵەکان بوو.
٣
ئەمئێستا
دۆزەخی من
پڕە لە تەماشای بەتاڵ،
پڕە لە بۆشایی خەیاڵ،
لە سامی ئەودیوی مردن،
لە ترس و بیم لە وونبوون و لە تەنیاییم.
وەرن گەورە پیاوانی مێژووی من.
دووربینەکانی مناڵیم تێکبشکێنن،
ئازاری بیرەوەرییە کاڵبووەکانم بسڕنەوە،
ڕووتمکەنەوە لە خەیاڵ،
وەکو داهۆڵ لە کێڵگەی خەونەکانتانا بمچەقێنن.
گەرووم پڕکەن لە درووشم و لە سروودتان.
لەساتوەختی گومانتانا،
وەکو زوڕنا و هۆڕینی سەیارەکانتان بمژەنن و بمخەنە ژێر باڵی ڕەشتان.
من ئیتر خانەخوێیەکی لەبارم
تەنیاییم پڕکەن لە کاولی
خولیام بە ئەفسانەکانتان بنەخشێنن،
لە غەریزەی شەڕانگێزتان هەڵمکێشن.
٤
وێرانمکەن،
ڕووتمکەنەوە لە ژیان،
تا دەست لە گەردوون شل ئەکەم و
پێم بڵێن،
ئەمەیە حەقیقەت.
ئیتر من بەندەی ئێوە و ئیرەییم، دنیاتان بۆ دێنمە سەرچۆک.
لە شەڕی چنگ کەوتنی کورسییەکانتان،
لە جەنگی بەشکردنی تاڵانییەکانتان،
لە پشتەوە
وەک مێژووتان
خۆتان بمدەنە بەر گوللە و
بڵێن شەهیدی وەتەن بوو.
وەرن بکوژەکانی من
لەسەر سووتووی خۆڵەمێشی ژیانی من، دانووستان کەن
لەسەر ڕۆحی لەت و پەت و تۆقیووی من،
فیستیڤاڵی گەنج بوونەوەی ئەبەدی خۆتان بگێڕن.
(دارا عەلی)

من بۆ هەڵدێم؟

وەرە و لە ڕاڕەوی دوودڵیمدا
لە حوزنی نیگام بڕوانە،
خەریکە وا دەبمە ڕۆبۆرت
هەست بە ترپەی دڵت ناکەم لەسەر سینەت
دەستەکانت وەکو جاران
نەختووکەی خەیاڵ ئەدەن،
نەتەزووی مووچڕک دێنن بە گیانمدا.
وەرە و بە توونێلی بێزاریدا
بە وونبوونما ڕۆبچووە خوار،
بڕوانە چی کۆتی کردووم،
گومانەکانم هەڵڕێژە،
گوناهەکانم پشکنە،
شەکەتیم ئاوەڵا بکە و
چرچ و لۆچی زامەکانم بخە سەرپشت
تا ئازار پشوویەک ئەدات.
ئەوجا تێئەگەیت بۆ هەڵدێم لەگومان و
لە تۆ،لە خۆم

من پڕترم لە پڕی

١
من پڕترم لە پڕی و
خەیاڵی بەدی تۆ و بێمروەتی دونیاش
لە هەژموونی خۆی ناوەستێ..
من ئەبێت هەموو ڕۆژێ مردنێک ئەزموونکەم هەتا سبەی لەخەو هەڵسم؟؟..
زەمانێکە؛
مەرگ وانەی ژیان ئەڵێتەوە و
بوون ئەخاتە سەر کەڵکەڵەی لەزەتی مانەوە و ڕاکەڕاک بەدوای هیچدا..
٢
بێ غیرەتیم
دەستی ناچێتە ئەم ڕۆحە کۆتکراوە.
لە حەسرەتا، چڕ چڕ ئەبمەوە و ناڕژێم.
لە ئازاردا، پەنگئەخۆمەوە و ناچۆڕێم.
چیتر زەوی بێزار بێزار لە بوون و لە کێشکردنم،
چیدی ئاسمان ماندوو ماندوو لە فڕین و گۆشکردنم.
٣ مەراقی من؛
تۆفانێک بوو، لافاو لە هەناویا بێنی و
تەنها جارێک وەڕسبوونم بشواتەوە و
خاڵیمکاتەوە لە ڕۆتین و لەپوچی ..و.. وەلێ نەهات.
ئومێدی من؛ بورکانێک بوو، ئەم تاریکستانە شەقکا بە ئاگر و
ترس و دوودڵیم ڕاماڵێ لەگەڵ خۆیدا و
بەتاڵمکا لە دنیای وەهم و دڵشکان..و..قەت نەخرۆشا.
٤
لە سۆراخی دەروازەی زەمەنێکیتردا
وەرە دڵم،
دەستت بخەرە کەمەری بڵێسەیەکی ناخمەوە و لەسەر ئیقاعی تەنیایی
لە سووتانی سەمایەکدا،
دوور دوور
ئەم ڕۆحە پەژمووردەم بەرە
هەتا وون ئەبم لە تۆدا
هەتا سەوز ئەبیت لەمندا..
(دارا عەلی)