من ماندووم،
لە ژێر باری قورسی ئەم هەموو مردنەدا.
وەرە ئەی یار،
لەسەر سنووری گەیشتن بە دڵی تۆ
ڕووت و قووتم بکەرەوە؛
لە خەمی ژەنگرتووی دوێنێ و سامی نیگەرانی سبەی،
لە تارمایی بوون بە خودا و
وەهم و خەیاڵی خۆشبەختی
لەم مەنفا بەرینەی زەوی.
(٢)
من ماندووم
لە ژێر باری ڕەش و سپی ئەم هەموو گوناهانەدا.
وەرە تەنیا فریادڕەسم،
لە سەر سنووری گەییشتن بە عەشق، بە ژیان،
کەوڵمبکە
تا لە پێستی ئەم ڕۆحە بەردینە دەرئەچم
ڕۆحێک،
ئاوێنەی دڵمی کردووە بە هەزار پارچەی پەژمووردە و وونەوە.
(٣)
تۆ تەنها جارێک وەرە و
بمخەرە سەر لەرەی ئاوازی خۆبەخۆی شەوقێکت،
تا دنیای مەییوو ئەیبەستێ و
منیش لە سەمای سووتانتا،
پەڕوباڵی ئاگر ئەگرم.
تاکو ڕووتییم،
بەدەم سەمفۆنیای سووتانی عەشقتەوە
باڵ نەگرێت،
ناگەم بە خۆم
نە بە ژیان و
نە بە تۆ.
(دارا عەلی 15/2/2014)
No comments:
Post a Comment