زەوی لەژێرپێمدا ئەناڵێ

   زەوی لەژێرپێمدا ئەناڵێ.

   پشتم مارکی چەقۆی غەدرە و

   سینەم  مۆزەخانەی زام و شوێن برینی شمشێرەکانی کینە و ڕق. 

   سەرم وێستگەی بۆمبارانی جاڕدەرانی مافی مرۆڤ.

   سنوورەکانی سەر جەستەی لەتوپەتم، جێ خەنجەری دەڵاڵەکانی سیاسەت و موختارەکانی حەقیقەت.

   ئەم جەهەنەمی ئازارە بە جۆرێک گەماڕۆی داوم

   ئیدی بوارێک نەماوە بۆ تێڕامان لە مردن یا بیرکردنەوە لە سبەی

  لەم بازنە خوێناوییەدا.. 

   (دارا عەلی)

من خەیاڵی سەرکردنم بە مزگەوت و مەیخانەدا

  من خەیاڵی سەرکردنم بە مزگەوت و مەیخانەدا وەکو یەک بوو؛

   لە میاندا لەسەرچۆک،

   لەبەردەم سامی مردندا

   ناڵەی ویژدانی زامار و خەم و بێزاری ڕۆژگارم پێ بەنج ئەکرد.

   لەویاندا سەرشۆڕ و سەرکز،

   لە تاو ترسی وونبوونمدا

   هاواری دڵی ڕەنجاو و ئازاری ڕەنجی دزراوم بە با ئەدا.

   ئەمئێستاش دوور لە مەی و دوور لەنزا،

   وەکو پەروانە بەدەوری ڕووناکی چرای عەشقێکدا

   کەتوومەتە سەما و فڕین،

   نەترسم لە مردنە

   نە لە وونبوون.

   (دارا عەلی)

دابران

   بەم هەموو دابڕانەوە،

   من ئەبێت لە پنتێکدا ئاوابم،

   تاکو تۆ بدرەوشێیتەوە.

   تۆش تا لە تاریکییدا وون نەبیت،

   ڕۆشناییەک ناگا بە من تەنیاییم گەرم بکاتەوە.

   چ ڕۆژگارێکی خەمناکە ئەی دۆست. 

   بە کۆمەڵ ئاوێنەکان هاڕە ئەکەن.

   چرپەی گۆرانییەکانی دڵ لە سێبەری ئەم هەموو چاوەڕوانییەدا هەڵئەوەرێن.

   خەیاڵ بەدەم گڕەبای ئەم هەموو شپرزەییەوە ووشک و

   خەونی باڵگرتن و فڕین پووچ و

   دڵ بوو بە دوو لەتی سەرگەردان و دوورەدەستەوە.

   ئیتر لەم سەرابستانی ئومێدەدا،

   من و تۆ ڕادەست بە مردنێکی لەسەرخۆ و هیچ.

    (دارا عەلی)

دڵم بۆت کردە نیشتمان

   من لەنێو داروپەردووی ئەم دنیا وێرانەیەدا

   دڵم بۆت کردە نیشتمان.

   کەچی ئێستا لەسەر سینەم قووت بوویتەوە و

   وەک پاڵەوانێکی دۆڕاو

   پڕیت لە پەیمانی درۆ و گەمەی لاسار.

   خەیاڵت خولیای جەلاد و

   زمانت بۆنی بارووت و

   چاوەکانت تینووی خوێن و

   کەڵکەڵەی سەرت مەراقی هەوەسبازی و یاری قوومار.

   هاتوویتەوە و

   چەپۆکت لەم بستە خاکە گیرکردووە و

   گەرەکتە

   بیکەیتە گۆڕستان بۆ من و

   جەهەنەم بۆ ژیان..

. وەکو یەک شەوقی دوو نیگا

   وەکو یەک شەوقی دوو نیگا،

   وەک دوو چریکەی هەمان سۆز،

   دوو هەناسەی یەک داگیرسان و سووتان بوو

   ئاوێزانبوونی ئەندێشەی من و خولیا و خەیاڵی تۆ.

   خەمی عەشق و دووری دڵان، نەفەسی فلووتی سینەی تۆ بوو ئەی یار.

   ئازار و ژانی ڕۆحی تۆش،

   نەغمەی ئاهو حەسرەتی تاری دڵی من.

   (دارا عەلی)

. چ بێدەنگ زەوی لەژێر ئاگرباراندا ئەسووتێت

   چ بێدەنگ زەوی لەژێر ئاگرباراندا ئەسووتێت.

   دیوارەکان تا دێت ئابڵوقەیان ئەستوورتر و

   پەنجەرەکان تاریکتر و

   دەروازەکان خوێناویتر،

   قەد و باڵای ڕزگاربوونی منیش کورتتر.

   بێدەنگی ئەم وێرانەیە کاسی کردووم.

   چ دۆزەخێکی سامناکتر بەڕێوەیە ئەی دۆست؟

   لەژێر تاوی ئاگری ئەم هەموو مردنەدا،

   منێک نیوەم،

   لە نێو سووتووی خۆڵەمێشی خۆیدا هەڵئەسێتەوە و لەگەڵ تۆ ژیان دەستپێئەکاتەوە.

  نیوەکەی تری ڕۆحیشم لە دوورەوە،

   بەچاوێک، سەیری فلیمی جۆگەلەی خوێنی ڕژوای خۆی ئەکات و

   بە چاوەکەی تریش، میلی کاتژمێری دەستی و ناچار بە گەڕانەوە ناو خولگەی سەرقاڵی ڕۆتینی بیرچوونەوە و مردن.

   (دارا عەلی) 

لەم گۆڕستانی هات و نەهاتەدا بڕیار بوو بێت.

  

   بەدەم خەم و ئازاری ئەم هەموو دڵشکانەی عومرەوە

   هێند چاوەڕێی ئامێزێکی فریادڕەس بوویت،

   ئاوی چاوت داهات و دڵت هاڕەی کرد،

   ئەوی نەفرەتی هەر نەهات.

   ئەو نەهات و

   تەمومژی دنیات چڕتر و وونبوونت تاریکتر و

   شکۆی ڕۆحت لەم دەستتاڕی مەیانەدا ووردوخاشتر.

   ترس و بێباکی گەییشتە دوا ترۆپک و

   تۆ خنکایت و

   ئەو هەر نەهات.

   تووڕەییت بوو بە کارخانەی گوناهی نەفرەتلێکراو،

   هێشووی بەرە خەون و خولیای دڵت بە چنگ ئەڕنی.

   بێزاریت وەکو ڕەشەبا ڕووناکی چرای ئەخنکاند.

   مردن گەییشتە سەر عەرش و

   تۆ شکایت و

   ئەو هەر نەهات.

   دوودڵیت بەدەم لەرزەوە تۆوی ڕق و تۆڵەی ئەچاند،

   ماڵت کرد بە لانکەی جەلاد،

   زەوی بە حەشری دۆزەخ و

   تانوپۆی ژیان بە کێڵگەی زام و برین.

   تۆ مردیت و

   ئەو فریادڕەسە هەر نەهات،

   تەلیسمێکی هەر نەگەییە ئەم گۆڕستانی باوەڕە و

   شایەتحاڵ چۆن

   دنیای بێباک و چاوەڕوان ناڵە و ئازار ئەدرووێتەوە؟!.

     (دارا عەلی)

وەک دوو نیگای ئەندێشەی خەمی یەک دیدە،

   وەک دوو نیگای ئەندێشەی خەمی یەک دیدە،

   وەک دوو گەردی مەراقی یەک نەفەسی قووڵ

   من و تۆ،

   بە مۆم و پەروانە ئەچین لە سووتاندا.

   چ تێکڕژان و ئاوێزابوونێکە عەشق ئەی یار.

   تەماشاکە،

   لەگەڵ گەییشتنی نەغمەی ئاوازێکی دڵی تۆدا،

   بۆوبەرامەی عەتری ئەم کەرنەڤاڵی ڕەنگانە چۆن سەرئەکات لە تەنیایی ڕۆحی مندا.

   لەگەڵ دەرکەوتنی ڕەنگی یەکەم تۆنی شەوقی تۆدا،

   سەدا و چریکەی ئەم ڤیستیڤاڵی سۆز و ئاوازە چۆن هەڵئەکات لە خەیاڵی سەری مندا.

     (دارا عەلی).