ئيلاهي هةر دلم ماوه

  ئیلاهی

  هەر دڵم ماوە،

  ئەویش وەکو لەزگەی برین

  بکە بە سەدان پارچەوە و بە ڕاست و چەپ

  بیخەرە سەر

  تانوپۆی نەخشەی برین و زامی خوێن لێڕژراوی تەمەنێک،

  کە بە تیغی چەقۆی حیزب و غەدری سیاسەت

  لەسەر مێزی قومارخانەکان نەخشێنران.

(٢)

  چەندە کووشندەیە پەتای

  ئەم نیشتمانی برینە.

  بێ دەرمان و بێ برین پێچ،

  پژانی خوێنی دڵ تیایدا بەربووە و ناگیرسێتەوە.

(٣)

  ئەی نیشتمانی لەت و پەت

  پەتای ئەم ئاشبەتاڵانە بۆتە تاعوون،

  بە چواردەورا تا بێت درێژ ئەبێتەوە.

  تۆ تەنها جارێک عاشقبە و

  ڕۆڵەکانت هێندە بێباک

  بۆ جەژنەکانت سەرمەبڕە.

(٤)

  بۆ کوێ ئەچیت،

  تۆش ڕۆژێک دێت کەنەفت و پیر، پشتکۆماوە

  بۆ ڕۆشنکردنەوەی بەر پێت،

  پێویستت بە ئەوینێکە دەستت بگرێت.

  بۆ ئاوەدانکردنەوەی تەنیاییت،

   ڕۆحێکی بە دەربەستت گەرەکە،

  خۆشەویستیت گۆشی کردبێت.

  لەوە ئەچێت نەوەکانت

  سبەی ڕۆژێک،

  ئەم جەنگەڵەت بخەنە زبڵدانەوە و

  ئەم جیهانەش لەوە بچووکتر ببینن کە ماڵیان بێ و

  خەون ببینن و خولیایان

  گەردوون بکەنە نیشتمان.

      (دارا عەلی 22/1/2014)