Sunday, December 27, 2015
Tuesday, November 17, 2015
Friday, August 14, 2015
گووتت وەرە
، گووتت وەرە
لەنێو جەنجاڵی دنیادا
هەگبەی بۆشی سەرم تووڕدا و بە خولیای پەروانە هاتم.
هاتم هەتا،
ئاوێزانی ماچی کڵپە و سەمای شادی بڵێسەت بم.
هاتم هەتا،
لەبەر شەوقی سووتانتدا ڕووتببمەوە لە تاریکی و
لە ئامێزی عەشقی تۆدا هەم یاردڵ و هەم دڵیار بم.
(دارا عەلی)
Saturday, August 1, 2015
تەنیا ئەڕۆم
بە شپرزەیی چاوساغێک،
هاتم و چووم و بە هیچ کوێ نەگەییشتم.
ئەوەی بینیم، جوانی کەلاوەنشین بوو.
ئەوەی بیستم، گەمەی دزێوی زمان بوو.
ئەمئێستاکە،
بەنێو جەنجاڵی دنیادا، تاک و تەنیا و بێ هاوزمان
وەکو کەڕولاڵێکی کوێر تێئەپەڕم.
بێئەوەی بە هیچ کوێ بگەم، تەنیا ئەڕۆم،
بەڕۆژ وەک خۆر و بە شەویش وەک مانگەشەو،
پەنا بۆ خەیاڵی هەور و حیکمەتی با و سەرگورشتەی سەفەری ئاو، ئەفسانەکانی ئاگر و
چیرۆکی خاک و خەونی دار و بەرد ئەبەم.
تەنیا ئەڕۆم، دوور لە هەر چاوەڕوانییەک؛
خۆم ئەدەمە دەست عەشقی وێڵ.
ئەڕۆم،
هەتا ئەگەم بە ناشوێنێک،
بێدەنگیم تیایدا وەکو باخ سەوز ببێت.
گۆشەگیریم وەکو مانگ و
بێهاودەمییم وەک خۆر هەڵبێت.
ئەودەم
چەند بەتاو بێت کڵپە و بڵێسەی تەنیاییم،
هێندە ڕۆشنە ئەوینم و
هێندە ئارامە خەمانم.
تەنیا ئەڕۆم،
چوون سەرکێشی
سەوداسەر و سەودای عاشقان نەدۆستی گەرەکە، نەدوژمن.
(دارا عەلی)
Saturday, July 4, 2015
.تەمەنێک من
تەمەنێک من
وێڵ و سەرگەردان بووم بەدوای عەشقی تۆدا.
ئەمئێستاکە
بەسەر لووتکەی ئەم عومرەوە،
ئەوەی من پێیئەگەم تۆ نیت،
خۆمم لەودیوو هاڕەی شووشەبەندی ناو و دەمامکی شوناسەوە.
من نەمزانی،
عەشق خۆم و
جێژووان خۆم و دیدار خۆمم.
دیدەی نەوگوڵی یار خۆم و
ساباتی ڕازی دڵ خۆمم.
نیوەی ژیانم گەڕان بوو بەدوای سۆراخی شەوقتدا.
ئەمئێستاکە
بەسەر لووتکەی ئەم عومرەوە،
ئەوەی ئەیبینم ئەسووتێ و ڕووناکی ئەبەخشێت تۆ نیت،
خۆمم لەودیوو ئاوابوونی سام و ترسی مردنەوە.
من نەمزانی،
ئاگر خۆم و کڵپە کڵپی سووتان و پڕووکان خۆمم.
چرا و پەروانە هەر خۆم و
خەون و خولیا و خەیاڵ خۆم و
شەوق خۆم و
ژیان خۆمم.
(دارا عەلی)
Monday, June 1, 2015
باخ و هەم باخەوان
تۆ بینایی چاوانی خۆت بەخشی بە من.
لە سەودایی ڕووناکیدا،
بووم بە ڕێگا و هەم بە گۆچان.
تۆ بەهاری دڵت ئاوەڵاکرد بۆ من.
لە خولیای خۆشەویستیدا،
بووم بە باخ و هەم باخەوان.
چ ئەبوو چی؟!
چ ئەبوو چی؟!
گەر لەم سەفەرەدا من و تۆ،
چوون دوو سێبەری لانەواز ئاوێزانی یەکتریباین؟
هەر بە وێنەی دووپەلی لێکئاڵاوی دارمێوێک هەڵکشاباین؟
چ ئەبوو چی؟!.
گەر من و تۆ
وەکو بە یەکگەییشتنی دوو پەڵەهەوری ژانگرتوو تا دوا دڵۆپە باریباین؛
نەژیان ئەبووە ناچاری،
نەدنیا وێرانە و خاپوور،
نەجیهان بنکەی پۆلیس و
نەئاسمان چاوی بێداری ئەهریمەن بوو.
چ ئەبوو چی؟!.
گەر من و تۆ
وەک ئاوێتەبوونی ئاوی دوو ڕووبار یا دوو جۆگەلە تێپەڕیباین؛
نەمرۆڤ ئەبوو بەخودا و
نە زەویش بە دۆزەخ ئەچوو.
چ ئەبوو چی؟!.
........؛.
دارا عەلی
Tuesday, April 21, 2015
کاتێک هەڵدێم
کاتێک هەڵدێم،
بە ئاسکێکی زامار و گۆشەگیر ئەچم.
ئەڕۆم و
تەنیاییم خوێنی لێ ئەچۆڕێت،
ئەڵێ ی دڵم،
بە خەنجەری درۆ و ڕیا لە سەد لاوە پێکراوە.
(٢)
تۆ بێ من ڕۆییشتیت،
منیش بێ تۆ گەڕامەوە.
تۆ دێت و من ئەڕۆم.
لەم هاتووچوونەدا،
نە قسەیەک ماوە بۆ ووتن،
نە دڵێک بۆ ژیان.
(٣)
چ بەدفەڕێکی گومڕابوویت،
بەکڵوکۆی سووتانمەوە هاتم و تۆ هیچت نەکرد.
چ گوناهکارێکی بەد بووم،
دڵشکاوانە چوویت و من هیچم نەووت.
(٤)
حەیف و جەخار،
لەم جەنجاڵی ڕۆژانەدا،
ژیان بەشی بیرکردنەوە لە تۆ ناکات.
مەگەر مردن فرسەتێک بێ و بوار بدات.
(٥)
ژیان چییە؟
کاتێک کە پردێک نەمێنێت، لە مابەینی مردن و لەدایکبوونەوەیەکیتر.
مردن چییە؟
کاتێک کە ئەوینێک نەبێت، لە شەوقیا دڵ گڕبگرێ و ژیان ڕووناکتر.
(٦)
لەم بازنە داخراوەدا،
هەر هێندەی چاوت کردەوە، ئیتر مەحکومیت بە مردن.
ئیتر تۆ تەنها تارمایی و خولیاو و خەون و سێبەری کەسێکیتریت.
لە منداڵدانی دایکتەوە،
هەر هێندەی تۆ خزایتە نێو
ئەم چواردیوارە بەرینەی چین چین هەڵچوو بە سامی ترس و مەیلی چێژ،
ئیتر ناچاری تەمەنێک شانبدەیتە بەر ئازار و
ئەشکەنجە وەک دەمی گوێزان هەموو ژیان توێ توێ بکا.
تۆش دەرنگانێک تێئەگەیت
بۆ ڕزگاربوون،
لە دایکبوونەوەیەکی تر پێویستە.
لە خەستەخانەی ئەم سەدە خوێن ساردەدا
لە خەستەخانەی ئەم سەدە خوێن ساردەدا،
خودا نەخۆش،
مرۆڤ نەخۆش،
زەوی نەخۆش.
منیش بیمار، لەم سەرابی دوکان و بازاڕەی عومرا،
لەسەر چەرپای ئازارێکی پشتکۆماوە، لە دوایین پەنجەرەی ژیان ئەڕوانم و
خەون ئەبینم کە تۆ دێیت؛
دەمێک دەگەیت، بۆوبەرامەت،
پێش خۆت وەکو شنەی شەماڵی دوا وەشتێ و
سۆزی دەنگت،
چوون چریکەی نەغمەیەکی عەلی ئەسغەر و خالقی خۆی ئەکەی بە ماڵی ڕۆحما.
کاتێک ئەگەیت گیانی گیانان،
ئەڵێ ی پەرداخێکی لێوڕێژ لە سەبووریت،
کەمەری خۆشەویستیت وا لە نێو ماچی پەنجەکانما و
لێواری سەرڕێژ لە عەشقت،
لەسەر لێوی ووشک و تینووم
ژیان ئەبەخشێتەوە بەر دڵەی خەستە و بیمارمدا.
(دارا عەلی)
Friday, April 10, 2015
جیهان بەردەوام ئەڕشێتەوە
جیهان بەردەوام ئەڕشێتەوە و کەسێک نابینیت هێڵنجبات.
خاک نەخۆش و
هەوا، سیخناخ بە ژەهرێکی شیرین.
ئاو کە خۆی گڕی گرتووە،
ئیتر چۆن ئاگری ئەم هەموو دۆزەخی نەوت و دۆلارەی پێ خەفە ئەکرێتەوە.
(٢)
بۆ بیرکردنەوە لە تۆ
هێندەی هەناسەیەک هەوای پاکم گەرەکە.
بڕوانە پەلەقاژەی هاواری من
لەژێر باری ئەم هەموو ژەهرەدا و
قاقای دڵنیایی ئەم هەموو نووقمبوون و خنکانە بە دەورمدا.
(٣)
ئەمەوێت بێمەوە.
ئەم کوێرەڕێیە وونی کردووم.
بۆ خۆکۆکردنەوە،
نەبینایی چاوم دیارە،
نەپەلوپۆی دەست و پەنجەم.
ئەڵێ ی لەژێر بەنجێکی قوورسدام،
قوورس هەر وەک ئەم ڕۆژگارە تاریک و نەخۆشانە.
(دارا عەلی)
تۆ لە کوێیت ئەی ژیانی من؟
نەخۆر مەرجی بۆ بەخشینی هەتاو دانا،
نەسینە و بەرۆکی زەوی بۆ میوانداری ڕووناکی و
نەئاسمان بۆ عەشقی فڕین.
نەماسی لە خۆشەویستی زەریا کەوت و
نەخەیاڵی دەریا لە هەڵکردنی شەماڵ و
نە(با) لە سوارچاکی هەور و
نەهەور لە باران بارین،
نەباران لە نووسینەوەی ژانی خاک و
نەدڵی خاک لە ژەنینی نۆتەی مۆسیقای ژیان و
نەنیگای باخ لە ئەوینداری پەپوولە و
نەپەروانە لە عەشقی ڕووناکی و سووتان دەستی هەڵگرت.
ئەی تۆ لەکوێیت؟
شاگۆرانی فریادڕەسم،
شەوقی خۆرەتاوی سینەم،
ئەی شادی شنەی شەماڵی هۆش و گیانم،
ڕازی پەنهانم تۆ لە کوێیت؟.
شپرزەیی بێ جێوڕێگەم لە بێدەنگیدا خستووە،
ڕابووردوو بۆتە دیواری چواردەورم و
سەرابی ئاییندەش زیندان.
ئەی ئەمئێستای وون و پەرتەوازەم لە کوێیت؟.
ئەی نەغمەی دڵی سەرەڕۆ و
ئاوازی خۆشەویستی من،
ئەی شاباڵی هاواری خنکاوم لە کوێیت؟.
تۆ لە کوێ ی شەوقی چاوان و بزە و خەندەی لێوم لە کوێیت؟.
لەکوێ ی شەقەی باڵی خەیاڵ، هۆشی سەرگەردانم لەکوێیت؟.
تۆ ئەزانی،
ئەم قەفەسە تەنگە بە باڵای ئەم عەشقە و
ئەم سەرابستانەش نامۆ بە نەغمەی ڕازی ئەم دڵە،
لەکوێ ی ئەی تین و توانی من،
ئەی شەقەی باڵی خەیاڵی بێسنوورم،
دەنگ و ڕەنگ و بۆوبەرامەی ئەوین لە کوێیت؟.
دەدەرکەوە ڕووناکی خۆری سەر ئێستام،
من نەمزانی
بەم هەموو دەمامکەوە مرۆڤبوون چۆن تۆی فریودا و منیشی وێران و پەرتکرد،
تۆ لە کوێیت ئەی ژیانی من؟
لە کوێیت؟
لە کوێ؟
(دارا عەلی)
Subscribe to:
Posts (Atom)