مرۆڤ ساتەوەختێک هەڵگری مانایەکە بۆ ژیانی خۆی کە بە ڕۆحێکی گەورەی هونەرمەندانەوە سەرقاڵی ئەزموونکردنی خودی ژیان بێ و ژیانیش وەک بابەتێک و سەرچاوەیەک بۆ بیرکردنەوە و تێڕامان سەرنج بداتێ بە مەبەستی بەرهەمهێنانی داهێنانی نوێ، داهێنانێک کە ژیان دەگەیەنێت بە ئاستێکی بەرزتر و باڵاتر. دیارە، ڕۆحگەلێکی مەزن لەم بابەتە بەرپایە لەسەر بنەماکانی خۆشەویستی بۆ جوانی ودانایی و خواستی هێز و گەشەکردن و بڕوای بە مەزنی و بەرگریکردن لە ناخ و خود جڵەوکردنی دەروون و کاری سەرچڵی هەیە.
هەرچی بوونەوەرانی ملکەچ و ئەڵقە لە گوێ ی دەسەڵاتدارەکانیشە، یاخود مرۆڤە گوێڕایەڵ و بە کۆیلەکراوەکانی بەردەم خودای ئایدۆلۆژیاکان و ئەو خەڵکی عەوام و ترسنۆکەش کە لە هەناوی پاشکۆیی مێگەلەکاندا نەبێت ئارامی و دڵنیایی نادۆزنەوە. ئەمانە ڕۆحگەلێکن ئەزموونی شێوازێک ژیان دەکەن کە بەتەواوی خۆیان خاوەنی نین، واتە ڕۆحیان، بوونیان چوون وەک بارمتە لە بەرامبەر ژیانیاندا دانرابێت ئاوا مامەڵەی دەکەن.
دیارە، هەستی ملکەچی و کۆیلەیەتی و پاشکۆیی بەرهەمهێنەری دۆخێکی سایکۆڵۆژیە ئەوتۆیە کە تیایدا مرۆڤ هەست بە خاوەندارێتی تەواو ناکات بۆ خودی ژیان و ڕۆحی خۆی، بەڵکو ئەو هێزانەی بوونی ئەم مرۆڤەیان جڵەو کردووە، بەشدارن لە خاوەندارێتی بۆ ژیان و بۆ ڕۆحی ئەم. بۆیە مرۆڤی ڕەشوک و عەوام و زەلیلی لەم جۆرە، ژیانێک ئەژین کە ژیانی خۆیان نییە، ئەمانە ژیانێک ئەزموون دەکەن بەتاڵ لە مانا و خواست و داهێنانی و مەزنی. ژیان بۆ مرۆڤانە هۆکارێکە بۆ بەدەستهێنان و پڕکردنەوەی پێویستیەکانی ڕەزامەندی خواوەندەکان و گەورەکان و ڕۆحی مێگەل ئاسا و چاوچنۆکی و دڕندەیی بەرپرس و دەسەڵاتدارەکانیان.
دەکرێت بڵێین ئەم بەدبەخت و زەلیلانە ژیانێک ئەزموون دەکەن و دەژین (نەک بۆ خۆیان) بەڵکو لە پێناو دەستەبەرکردنی پێویستیەکانی میکانیزمی تێرکردنی خواست وویستی هێز لای گەورە و دەسەڵاتدارەکانیان.
لێرەوە، ڕەگوڕیشەی زووربەی بەدبەختی و کوێرەوەریەکانی ژیانی مرۆڤ تا ئێستاش بەرهەمی جیهانبینی و بیروباوەڕەکانی خودی مرۆڤە خۆیەتی لە پەیوەند بە بوون و بە گەردوون و جیهانەوە
