لێگەڕێ ئازیزم لێگەڕێ -بەشی ۱-
لێگەڕێ ئازیزم لێگەڕێ
پێ ئەچێت تەنیاییت قەدەرێک بێشووناس
بای سەردەم بیەوێ لە خۆیدا لوولی کا و تا ئەوپەڕ سنووری ڕامکردن،
دامەنی بێزاریی ئەم ڕۆحەت جڵەوبکا و
بیخاتە سەر خولیا و کەڵکەڵەی بەدئاسای شەڕەباکان.
تۆش
بە ترووسکەی ئەم مۆمەوە
بەر بەم لێشاوانەت پێ ناگیرێت؛
کە لە کونجەکانی تاریکیەوە سەردەردێنن و
تا دوا سنوورەکانی لە ززەت لە زەلیلکردنی ئومێد چێژ دەبینن،
تا دوایین دڵۆپی جوانی ڕۆح دەگووشن و
ئاسۆکان دەبەخشن بە بەسەراب،
هەیبەتی خەونەکانیش بە زەردەی خەزانێکی ئەبەدی.
لێگەڕێ ئازیزم
تۆ لە نەوەی ئەمڕۆ ناچیت.
بۆوبەرامی ئەندێشەی تۆ
لە ئامێزی ئەم باخە دەستکردانەدا ئۆقرە ناگرێت،
نە وەهمی باخەوانەکان،
نە خەیاڵی بێ ڕەگ و ڕیشەی نەمام و درەختەکان،
نە تەلیسمی شاخ لێڕواووی داستانەکان... فڕیوویان دای،
نە خوڕافەی تلیاک ئاسای ئەفسانەکان... ئابڵووقەی دای،
چی دی،
بەم تەمومژە چڕەوە،بە کۆڵی ئەم بێزاریەوە
گرەوی شەڕە چەقۆی ئەو ڕەشەبایانەت پێ ناکرێت،
کە لە پریاسکەی کاڵبووەوەی خەیاڵیاندا،
جگە لە بەتاڵکردنەوەی مەراقی بوغزێکی دێرین
لە هەگبەیاندا چیتر شک نابەن بۆ بەخشین.
بە شنەی ئەم شەماڵەوە
لە ساباتی ئەم جێ ی ژووانانەی عەشقدا
بەرگەی زۆرانبازی چەقۆکێشەکانی زوڵمەت ناگریت؛
کە بە یەقینێکی کۆنەوە،
کوێرانە خەنجەرە ژەهراوییەکانیان ئەوەشێنن و
لە بێباکی و ئارەزووی سەرکەوتنێکی ئەبەدی خولیایەکی تر شک نابەن مەستیان بکا و پێ ی سەرسام بن.
بەم ڕۆحە سەرکێشەتەوە
کە یاخیبوونی ڕام ناکرێ و کە دیار نییە ڕوو بەرەو کۆێن ،
دەرەقەت گەمەی جامبازەکانی سیاسەت و
دەڵاڵەکانی بازار و
قاچاخچیەکانی چەک نایەیت؛
ئەو سیاسیانەی
لە داڵانە تاریکەکانی ڕۆحیاندا ڕۆژانە ویژدانی خۆیان ئەتک ئەکەن،
لە کۆشک و تەلارەکاندا، بۆ تێرکردنی غەریزە بەدەکانیان،
تەونی درۆکان ئەچێنن،
تا جڵەوی باڵندە نەسرەوتەکانی خەیاڵ بکەن
تا خەونەکانی تەنیایی ئەم ڕۆحە سرکە زەوتکەن
دەست بدەنە بینەقاقای هەر گومانێک لە هەیبەت و لە شکۆیان ،
لەو بۆسانەی مەرگ خۆی تیا مەڵاسداوە
وەکو عادەتی جارانیان بە ناوی خیانەتەوە،
چاوی ڕاستی هەڵبکۆڵن و دزە بکەنە منداڵدانی ناخ و
یەک یەک کۆرپەلەی خەون و هیواکان لەباربەرن.
یاخود ئەو دەڵاڵانەی کە
بە ڕۆحێکی دڕەوە لە بازاڕا تەوقمان ئەدەن
پاشماوەی خەونەکانی مناڵیمان ئەڕووتێنن و
بەدەم بزەی بە جێماوی سەر ڕووخساری لاشەیەکی مردووەوە
بێباکانە ژەهر وەک ئۆکسجین ئەنرخێنن بۆ ژیانمان،
وەک ژوورێک لە ماڵەکانی نیشتماندا،
ڕۆحمان بە ڕەهن ئەگرن و
ئێسک و پرووسک و ماسوولکە و خوێن و هۆشی کەللەسەرمان دەکەنە خۆراکی قازانج.
بە شە و ڕۆژ
لە کوچە شەقاماکاندا بەری ڕێگامان پێ ئەگرن
دەمانخەنە سەر کەڵکەڵەی یاریەکی دڵڕەقانە و
لە هۆڵ و ژووری نووستندا،
نیگای ڕامان و سەرسامی چاوەکانمان لێ زەوت ئەکەن،
خەون و خەیاڵمان دەستەمۆ و گەرووی دەنگمان کۆنتڕۆڵ و
چێژی بۆن، لەمسکردنمان ڕام ئەکەن و
ئەوەتانێ بووین بە کۆیلە و گوێڕایەڵ و دەم داچەقیوی سەرسام بە ئەفسانەکانی ڕیکلام و بەرنامەیان
وەک دوا دەروازەی گەییشتن بە حەقیقەت،
بێ ماندووبوون، بێ دوودڵی سەردەخەینە سەر سەرین و لێ ی دەخەوین.
یا باڵای ئەو قاچاخچییانەی
تۆوی مەرگ دەچێنن و
بە فیتنەکانیان گڕی دۆزەخێکی دی خۆشدەکەن
جەهەنەمێکی تر بۆ ئەتککردن و
تا سەر ئێسقان قیامەتێکی تاریکتر،
تاکو مردن، ژیان نەفرەت لە خۆی بکات و
لە ترسانا، لەگەڵ درۆ گەورەکاندا ئولفەت بگرێت
لەگەڵ وەهم و غرووری ئەفسانەکاندا خۆی گونجێنێت،
تا سەرکردە بێباکەکان دەربکەون و
بە زمانی چەک و گوللە درووشمەکان بنووسنەوە و،
تاکو تەور و قەمە و قامچی و ئوتوو و کێبڵ ئەگەڕێنەوە سەر شانۆ و
دەقەکانیش دڵنیاییەکی درۆ ببەخشنەوە و
ئێمەش دەوری گورگەکان نماییش بکەین،
دواتر بە ڕۆحێکی بێباک
بە دەست و پەنجەی خوێناوی و
دەروونێکی پڕ لە بوغز و ڕازونیازێکی بەد و
بە ویژدانێکی قاندراو بە تەم و غوباری مەرگ
بە تۆفانی بێبەزەیی ڕقێکەوە کە عەشق و جوانی تووڕئەدات
بچینەوە باوەشی یار،
بچینەوە خەڵوەتگای شەو.
لێگەڕێ ئازیزم
دەنگدەرهاتن و بانگەواز سوودی چییە؟
کە گوێ ی بیستن،
تا ئەوپەڕی بە بێباکی ئاخنرا بێت،
وەک چوون بانگهێشت لە بێئاگایی (کەڕ)ێک بکەیت،
کە خەریکە دەکەوێتە بەر وورووژمی شەپۆلی لافاوێکی مەست بە هەڵبەزین و دابەزین،
یاخود ژێر پێ ی چڕی پۆستاڵ و قۆنەرە و ئەو نەعل و پاپووچانەی کە
تەووژمی تۆفانێکی دڵڕەق و کوێر ئاڕاستەی کینەیان ئەکات
چوون شاڵاوی تەتەرئاسا، ڕووی خەزانێکی ئەبەدی، بێ بەرگری
وا گەیشتوونەتە لووتکە و سەر سەری ڕۆحی بێباکی و
گەڵا و گوڵ و خەون و خەیاڵی پێکەوە ئەوەرێنێ
تۆنی نەغمە و چرپەی لێو و دەنگی گەروو و ناڵە ناڵی سینەی پێکڕا ئەژاکێنێ و
تاکو ناخ دانەڕووتێنێت لە سەوزایی و
ئەم ڕۆحە بەتاڵ و وون و بێشووناسەش
ئاوێزانی ئەم گێژەنە بەدمەستەی باڵای خۆی نەکا و تا دوا سنووری هەناسە
چوون مێگەلێ پێش خۆی نەخا واز ناهێنێت.
لێگەڕێ ئازیزم
نیگاکردنی عاشقانە هێندەی بزەیەک چییە، پاداشتی نییە
کە ئەم جووتە چاوەی بینین
هێند بێدەربەست
لەخۆبایی کردبێتە چاویلکەیەکی ڕەش و تار
وەک زووڵمەتی ئەم سەردەمە
کە تەلیسمی بینین سڕ و پرشنگی نیگا وون ئەکات.
تۆ بڕوانە
شپرزەیی ڕوحێکی سکوت ئەو ساتەی مێگەل کاری پێ نامێنێت،
وەک گومان و دڵەڕاوکێ ی سووڕانەوە لە بازنەی ترسێکی نادیار و کپدا
کاتی وونبوونی منداڵێک، بزربوونی نا بینایەک لە دووڕیانی گەردەلوولێکدا.
چوون جێمانی مەڕێک لە ڕان
کاتێک پەڵەیەک سەوزەگیای بەهەشتی فڕیووی ئەدا و
لوورە لووری گورگی برسی دێتە بەرگوێ ی
لە حەسرەتا
باڕە و باعەی هەر مێگەلێکی ڕاگوزەر بێت لەوناوە
خۆی ئەئاخێتە هەناوی بۆ شووناسێ و
لە گێژەن و جمە جمیا بۆ ئەبەدی خۆی وون ئەکات.
لێگەڕێ ئازیزم
گەر شەپۆلەکانی دەنگێک
لە ئاگردانی خامۆشی ئەم ڕۆحەدا
چاوی پشکۆیەکی جوانی ژیان نەگەشێنێتەوە
گوێگرتن باکی بە چیە؟
لێگەڕێ ئازیزم
با سیحری ئەو وەهمانەی کە با دەیئاخنێتە خەیاڵ و خوێنمانەوە،
باری زەلیلی و بێباکیت تیا سەوز نەکەن .
چیتر بە تۆ چی ئەوینم،
خەیاڵی خومار و ووڕێنەی بەدمەستی و
سینیەک تووتن و پاکەتێک سیغار ر و هەلوەسەی بێهۆشی
یا کەوتن بەدیار خەمی ئەبەدی منارەکانەوە؟
بەدەم تەزبیح هۆنینەوە،
گوێبیستی ئەفسانەکان لە بڵندگۆکانیشەوە بێت دادمان نادا.
ئەوەی لێرە کۆتمان ئەکات
قەدەری ئەو یەقینەیە، کە گەرووی لێ زەوت کردووین،
گوێبیستنمان وەک غوڵامێکی گوێڕایەڵ قووڵاغ ئەکا.
ئەوەی لێرە ئەمانکوژێت؛
لاڵی زمان و ئەو سەرەیە کە بەردەوام و بێهوودە ئەیلەقێنین،
بێدەنگیشمان بەرد بە بەردی پایەی ئەو زیندانانەیە، بە چواردەورا هەڵیئەچنین.
ئەوەی لێرە بینمان ئەگرێت،
ئەوەی ئەمانکاتە لێبوک،
ئەمانکاتە داهۆڵی ڕووت بەسەر داروپەردووی ڕۆحمان،
غرووری ئەو یەقینە لەم هەناوی زووڵمەتەدا وەکو زیندووی نێو مردووان،
نیگا و هۆشمان ئەنەخشێنێت.
ئەوە هەلوەسەی فڕیوی بۆشاییەکی بێ بنە،
بت و پەیکەری سەر کورسی عەرشی ئاسمان و سەر زەوی چوون ڕاستییەکی ئەبەدی،
لە ناخماندا ئەچەپێنێت.
لێگەڕێ ئازیزم لێگەڕێ
لەم جێیەدا کە سەرزەمینی ناوە،
دوور لە دۆڕان بردنەوەی ئەم ڕۆحە وێرانکەرانە
دوور لە بەهای سەرکەوتن و ژێرکەوتنی ئەم جەنگە خوێناوییانە
دوور لە پێکدادانی باڵی ڕەش و سپی ئەم باوەڕە ڕزیوانە
دوور لە خوای پیاو دوور لە خوای ژن، لە خوای ئاسمان و سەرزەمین،
جگە لە ئێستای عەشقی من و تۆ و تۆوی خەونێک تا ئەپەڕی خۆشەویستی بۆ سبەینێ چیتر نییە.
No comments:
Post a Comment